熱線通告

本會會員譚銳權日前不幸與世長辭，對於他的離世，本會仝人深感婉惜，並向其家人致以深切慰問。譚銳權先生一直擔任本會無障礙數碼科技通訊的編輯工作，致力於推動視障人士使用電腦及數碼科技，樂於助人，還會不時發放教學樂音供會員學習和參考，亦曾在本會擔任免費的電腦導師，在此，本會衷心感謝譚銳權先生一直以來對本會及視障人士作出的貢獻。

譚銳權先生的喪禮謹定於2024年3月5日星期二下午5時於鑽石山蒲崗村道一八一號 鑽石山殯儀館四樓八號禮堂進行，如需本會代轉帛金，請於3月5日下午4點前交到服務中心。

各位會員大家好！平時我地嘅活動得以順利進行，義工朋友都擔當住好重要嘅角色。為咗可以讓更多新訓練嘅義工更有信心踏出佢地嘅第一步，開始參與我地嘅服務，今次我地就舉辦一D輕鬆嘅工作坊，等大家同新義工可以互相認識，而新義工又可以應用佢地係義工訓練學到嘅技巧同大家相處。

話說復活節就黎喇，今次嘅活動就會同大家整復活蛋活動會係3月23號(星期六)舉行，活動時間係下午1點30分至大約4點30分左右，活動地點係愛民邨服務中心。參加者需要係活動當日下午1點15分，係何文田港鐵站A出口(近美心餅店位置)集合。到時會由新義工同大家一齊行去服務中心。活動只限基本會員報名參加，收費每位$10。
  
有興趣嘅基本會員可以係3月5日(星期二)下午3點至3月12日(星期二)下午3點致電或whatsapp至報名熱線2760 1162報名。每通電話可報1個人。名額6個，如果報名人數多過名額嘅話，就會進行抽籤，抽籤結果將會係3月14日(星期四)嘅熱線中公佈。

如有任何查詢，歡迎致電2760-0100與職員阿彬聯絡。

長者活動：港島茶聚尚餘少量名額，歡迎60歲或以上，居住係港島區嘅老友記會員，一齊嚟飲茶，等思韻可以同大家傾下計，了解大家嘅近況。有興趣嘅老友記可以繼續打嚟2760 1162報名㗎！而之前報咗名嘅會員已經全部成為正選，如果對報名狀況有任何疑問，或者唔肯定自己係咪成功報名，都可以打返嚟服務中心查詢。 

我地會係3月13日(星期三)去北角英皇道294號五洲大廈2樓嘅百好名宴飲茶。參加者需要係活動當日上午9點45分，係炮台山港鐵站B出口(即第2個英文字母)出閘位集合。收費方面，60歲或以上基本會員或贊助會員每位$55，同行者每位$80。 
思韻當日嘅活動電話係6354 7383。如果有任何問題，歡迎致電2760 0100同職員思韻聯絡。

我哋已經喺2月27日嘅新春晚宴頒發左服務中心45週年標語創作比賽獎項，恭喜得獎者，以下讀出得獎名單

會員票選我最喜愛標語得獎者：10號 馮錦華  (獎座，現金禮券200元)
協進四五顯光芒，職員義工皆精英。
爭取權益冇手軟，資訊科技走在前。
提倡共融好溫馨，北斗光環耀協進。

街坊票選我最喜愛標語得獎者：29號 伍美儀  (獎座，現金禮券200元)
服務中心是你的好朋友，陪你克服每一個困難，與你分享每一個喜悅。

季軍得獎者：38號 李波比 (獎座、現金禮券400元)
回望四十五年前，服務中心已開展，
人士雖然有變遷，服務承諾不會變，
努力創新求發展，齊心協力衝向前。

亞軍得獎者： 8號  杜四嬌  (獎座、現金禮券700元)
四十五載好光景，服務水平日提升。
中心職員全力拼，會員義工合力成。
上下一心務求精，再創高峰會務興。

冠軍得獎者：3號 譚世鴻  (獎盃、現金禮券1000元)
服務中心四五載，各式活動不斷來。
動靜益智創意在，關顧病老也展開。
中心新裝確現代，共融果樹齊來栽。

再一次恭喜以上得獎者。

我哋總共收到136位會員投選我最喜愛標語，我哋會喺呢136位會員裏面抽出兩位，分別可以獲得一張$50超市現金券，以下讀出兩位中獎名單：王賢志 ，鄺兆明
。得獎者請喺3月31號星期日之前嚟到中心領取。如果有任何問題，歡迎致電2760 0100同職員IRIS聯絡。 

大家可能對保險業充滿好奇，例如做從業員真係咁自由？點樣入行？個試難唔難試考㗎？點樣先可以透過呢個工作去幫到人？今次職教中心就邀請左現職保險從業員，亦曾經係一位社工嘅黃婉鈴女士，分享佢點解會轉行，同講解保險業運作、主要產品，入行要求等等。

日期：2024年3月27日 (星期三) ；
時間：晚上7時至9時；
地點：觀塘翠屏邨職業及教育資源中心;

對象: 18歲或以上的中心會員或視障人士;
費用: 全免；  
名額: 15人；  
報名﹕可於即日至3月18日(星期一)親臨職教中心或致電23372736報名，如報名人數過多名額，就會進行抽籤，抽籤結果會係3月21日(星期四)既熱線中公佈。

如有任何查詢，可致電23372736與職教同事Jason 或 Susan聯絡。

社會福利署「殘疾僱員支援計劃」已於二零一九年開始全年接受申請，此計劃目的為聘用殘疾人士的僱主提供一次性的資助，用作購置輔助儀器及改裝工作間， 社署會根據申請機構和轉介機構提供的理據，逐一考慮申請資助的項目。與視障朋友相關的輔助儀器例子包括：點字產品或顯示器、音頻信號或警報、屏幕放大或語音閱讀軟件、放大工具、文件助讀器、具語音功能的智能流動裝置、具點字或語音輸出功能的個人數碼助理、錄音儀器、視覺放大儀器及物件識別器（如具語音功能的標籤閱讀器）。每份申請資助為一次性，每位受惠的殘疾僱員可獲批的資助金額上限為四萬元，以加強對殘疾僱員及其僱主的支援。

社署委託保良局協助管理計劃，申請方法為僱用殘疾人士的僱主由轉介機構協助申請，轉介機構包括社署資助營辦職業康復服務的非政府機構、獲僱員再培訓局資助，並為殘疾人士或在工傷後康復人士開辦訓練課程的非政府機構、勞工處展能就業科、職業訓練局及保良局。

各位會員如果你有興趣申請「殘疾僱員支援計劃」，可以同你地既僱主講，然後由僱主搵我地協進會做轉介機構申請，如有任何查詢，請致電23372736與就業同事 Jason 或 Susan聯絡。

各位會員︰
近日發現有人直接將外賣食物盒及廚餘棄置在廁所或4號房的垃圾桶內，招致一系列的衛生及安全問題。為使中心的環境更衛生，現4號房、5號房及6號房的垃圾桶已更換成旋轉蓋式垃圾桶，各位棄置垃圾時需確保垃圾已掉進垃圾桶內。另外亦請大家合作，用饍後將所有盒、袋、杯、廚餘等，全部棄置到走廊左邊第一個房間茶水間內的有蓋垃圾桶，並稍稍清潔枱面。請勿胡亂棄置食物或者將盒、袋、杯、廚餘等食物類垃圾。你的一分力，有助於中心建立一個理想的衛生環境。多謝大家合作﹗